بعد تسجيل السكن هاتحتاج تسجل في مكتب الصحة اللي انت تابع ليه، ده بيفيدك انك بتاخد الخدمات الصحية الحكومية والتطعيمات والطواريء، انت طالما موجود هنا قانوني وعندك شغل وبتدفع ضرايبك والتأمين الحكومي، فانت ليك الحق في الصحة والعلاج، لكن لو مش مسجل معاهم كل مرة هاتحتاج تروح هاتضطر تخلص اوراق كتير، وبعدها هايجيلك على البيت جوابات انك تدفع فواتيرر العلاج، او تثبت انك ليك الحق في العلاج، ساعتها لو انت مسجل ومعاك الكارت الحكومي ده بيريحك من الإجراءات دي.
المتطلبات لكارت الصحة:
- شهادة التأمين الاجتماعي، وموجود فيها كل التابعين ليك في حالة الأسرة.
- كارت الإقامة أو الباسبور وورقة تفيد رقم إقامتك
- شهادة السكن، طريقة عمل الشهادة هنا: https://www.masryfemadrid.com/2023/01/31/how-to-do-el-padron/
- اي حد فوق ال١٨ سنة لازم يكون موجود بنفسه
خطوات التسجيل:
- هاتدخل هنا وتشوف مكتب الصحة اللي انت تابع ليه https://www.comunidad.madrid/servicios/salud/centros-salud-atencion-primaria
- هاتروح المكتب بالأوراق المطلوبة
- هاتختار طبيب الأسرة، وطبيب الأطفال في حالة لو بتسجل لأطفال معاك
- هاتخلص الاجراءات وتاخد الكارت وانت واقف
- تقدر تنزل عالموبايل الآب عشان تاخد بيه مواعيد وتشوف الخدمات المتاحة ليك، هاتلاقيه باسم Cita Sanitaria Madrid
الخدمات المتاحة:
- الطواريء: ودي لاي حاجة تحصل وتروح الطواريء في اي مستشفى ومش محتاجة اي اجراءات
- الكشف العادي : ودي طريقتها انك بتحجز معاد مع طبيب الأسرة، وتروحله وهو يحولك على التخصص التاني لو الحالة محتاجة.
- التطعيمات: ودي جداول متاحة لكل أعمار الأطفال