لو انت معاك إقامة وعايش في اسبانيا، فمن حقك تعمل دعوة لأي حد من مصر لعمل زيارة ليك.
الدعوة دي مش ضمانة لانه ياخد الفيزا ولكن بتقوي الموقف شوية. تقدر تعملها لأي عدد بحد أقصى ٩ أفراد، بشرط انهم كلهم بيقدمو مع بعض، ويسافرو في نفس الوقت.
خطوات عمل الدعوة
- هاتاخد الاوراق وتروح القسم اللي انت تابع ليه، ساعات بتحتاج تحجز معاد وساعات لأ، كله بيعتمد على القسم نفسه.
- بعد اما بتقدمه بيقولك تعالى خده بعد حدود ٢٨ يوم
- لو شقتك مفيهاش اوض زيادة، لازم يبقى فيه حجز خارجي، ولو معاك حجز خارجي هايقولك انت مش محتاج تعمل دعوة اصلا، بس عرفه انك عاوز تعملها برضه
- السعر للدعوة في حدود ٨٠ يورو ، ويضيف لكل شخص فيها ٦ يورو
- بعد اما بيراجع معاك كل الأوراق، بيكتبلك القيمة اللي هاتدفعها، ويديك الورق تاني، بتحتاج في ساعتها تروح البنك تدفع وتاخد الوصل وترجعله تاني، ساعتها هاياخد الورق كله، ويديك وصل تستلم بيه بعد حدود شهر
الاوراق المطلوبة
- صور باسبورات الناس اللي بتدعوها
- صور الNIE و يكون معاك بيشوفه
- عقد الشقة اصل وصورة
- صورة للPadron، طريقة عمله موضحة هنا: https://www.masryfemadrid.com/2023/01/31/how-to-do-el-padron/
- صورة للحجز لو حاجز خارجي
- الفورم https://sede.policia.gob.es/portalCiudadano/sede_electronica/extranjeria/carta_invitacion.pdf وتعمل فورم لكل شخص جاي
- الفورم دي تملاها وتطبعها https://sede.policia.gob.es/Tasa790_012/ImpresoRellenar
- الفورم التانية اسمها tasa 790 code 12
تختار نوع الفورم carta de invitacion ولازم متدفعش فلوس اونلاين، بعدها اما تملى كل حاجة تطبعها وتاخدها مع الاوراق فوق
- الفورم التانية اسمها tasa 790 code 12
التقديم على الفيزا
بعد استلام الدعوة محتاج تعمل الخطوات دي
- تبعت الدعوة لمصر للي هايقدم عالفيزا
- هايطلب معاد لتقديم الفيزا من الbls وهايعمل نوعها Family visit
- هايقدم الأوراق المطلوبة كلها، ومعاها الدعوة
- ساعات بيطلبو ورق اثبات اكتر لو فيه صلة قرابة أو كده، ساعتها هاتحتاج تقدمه عشان تكمل الإجراءات