عشان تعمل الرخصة في اسبانيا محتاج تعدي ٤ خطوات
- تسجل في مدرسة سواقة
- تعدي امتحان نظري (اسباني أو انجليزي)
- تعمل كشف طبي
- تعدي امتحان عملي
بعض النقط المهمة
- تسجيل مدرسة السواقة ممكن يبقى بعد النظري، بس الاحسن تبقى قبلها عشان هما بيساعدو برضه في التسجيل
- رسوم التسجيل في حدود ٩٠ يورو، تشمل ٣ محاولات للامتحانين، لو خلصت المحاولات قبل ما تنجح في العملي، هاتدفع الرسوم للتسجيل تاني
- كل امتحان ليه رسوم منفصلة، ومدارس السواقة بتضيف كمان رسوم
خطوات التسجيل
١. تسجيل مدرسة السواقة
فيه مدارس سواقة كتير موجودة في مدريد، محتاج تعمل سيرش ب (auto escuela) وهايجيبلك الاقرب ليك، من المميزين وفيهم انجليزي Gala و Lara
٢. تعدي امتحان نظري (اسباني أو انجليزي)
الامتحان مكون من ٣٠ سؤال، محتاج تعدي ٢٧ على الأقل عشان تنجح، بتحجز من خلال المدرسة أو اونلاين من موقع المرور وبتحجز معاد، وتروح لجنة تمتحن، والنتيجة اخر اليوم
٣. تعمل كشف طبي
بتبقى اماكن مدرسة السواقة بترشحهالك، كشف بسيط نظر وسمع واستجابة للمؤثرات
٤. تعدي امتحان عملي
عشان المدرسة تسجلك الامتحان، لازم بتاخد معاهم شوية حصص عشان يقدمولك أو يقولولك انك محتاج أكتر لو مش جاهز.
الامتحان نفسه عبارة عن انك بتسوق لمدة ٢٥ دقيقة على الاقل، وبتعدي على شوارع داخلية وطرق سريعة، وبيخلوك تركن برضه.
تقييم الامتحان بيبقى عن طريق النظام ده:
- فيه ٣ انواع للأخطاء (بسيط، متوسط، أو نهائي)
- تسقط لو وقعت في أي حالة من الحالات دي:
- ١٠ اخطاء بسيطة
- خطئين متوسطين
- خطأ متوسط و ٥ أخطاء بسيطة
- خطأ واحد نهائي
- دي قايمة بالأخطاء وامتى تبقى تبع انهي نوع
لما تعدي الامتحان في خلال يوم بيدوك ورقة تمشي بيها وتقدر تسوق لمدة ٣ شهور بيها لحد اما الرخصة توصلك على بيتك